O presidente do Real Madrid, Florentino Pérez, saíu ao paso da crise do equipo coa convocatoria anticipada de eleccións e o anuncio de que se volverá a presentar para «defender» ao club dunha «confabulación» na súa contra entre duras acusacións aos medios de comunicación. Pérez, que compareceu este martes en rolda de prensa tras unha xunta directiva, lanzou unha diatriba aos medios de comunicación que, segundo el, queren controlar o Real Madrid. Denunciou unha «orquestración dos malos xornalistas contra o Real Madrid», tras citar a todas as grandes radios comerciais do país e algúns dos seus presentadores. «Vou acabar cos xornalistas que se meten co Real Madrid», asegurou, tras criticar en particular ao grupo Vocento e anunciar que vai darse de baixa de subscritor da súa principal cabeceira, o xornal ABC. O dirixente branco, de 79 anos, tamén saíu ao paso de rumores sobre o seu estado de saúde, que cualificou de «perfecta» e insistiu na súa intención de cambiar os estatutos do club para ter un novo modelo no que os socios poidan patrimonializar a súa propiedade, algo que xa anunciou na asemblea de 2024 e que apenas volveu desenvolver na do 2025.
0