40.000 persoas participaron na manifestación de Barcelona, segundo datos da Garda Urbana, e a choiva, a intres moi forte, non impediu que outra multitude saíse á rúa en Madrid. Igual que en Valencia, Alacante, Zaragoza, Santiago de Compostela, Vigo ou A Rioxa. As manifestacións foron o colofón á xornada de folga xeral do 11N, convocada por CCOO, UXT, o Sindicato de Inquilinas e outras entidades sindicais e sociais. Os manifestantes dirixiron os seus berros contra os «rentistas», os fondos voitre ou as inmobiliarias.
En Galicia houbo cargas policiais na Coruña e Santiago. CCOO cifraba o seguimento na industria de entorno ao 70 %, con fábricas «paralizadas» tanto en Ferrol como en Vigo e unha actividade practicamente nula nas factorías de Navantia e Alcoa ou nos principais centros de automoción de Vigo e O Porriño. Comisións Obreiras aseguraba que a parálise foi case total no naval. Non houbo actividade na quenda nocturna de Navantia en Ferrol e tampouco no estaleiro de Freire de Vigo. Tamén foi importante o seguimento en factorías como Pescanova Chapela e na farmacéutica Cofan.
En todo caso, a folga xeral provocou atrasos na recollida de leite e na distribución de pensos que non significaron «nada grave» para as explotacións galegas. Nos aeroportos foron cancelados seis voos en Santiago e outros catro en Vigo pola folga xeral. Na terminal da Coruña non houbo incidencias.