Francia vivía este sábado unha nova xornada de protestas contra o aumento do custo da vida, que deixaba polo menos 135 detidos en todo o país, segundo o balance ofrecido polo ministro do Interior, Laurent Nuñez. En Lyon, as unidades antidisturbios volveron a despregarse nas rúas e, segundo os primeiros informes, dispararon gases lacrimóxenos para dispersar unha concentración duns 150 manifestantes que tentaban bloquear unha estrada próxima ao centro da cidade, onde había restricións ás protestas. As multitudinarias protestas saldáronse cunha violencia xeneralizada e enfrontamentos coa Policía en varias cidades, con edificios e vehículos incendiados e encapuchados rompendo escaparates e saqueando comercios. Esta fin de semana, o Goberno francés reforzou os dispositivos de seguridade e moitos negocios optaron por tomar medidas pola súa conta, blindando os seus escaparates ou pechando durante todo o día. Ata 70.000 axentes foron despregados en todo o país para evitar que se repitan as imaxes de guerrilla urbana do sábado 17, cando uns 3.000 comercios foron vandalizados e saqueados.
0