- A resolución ten carácter provisional e as entidades solicitantes dispoñen agora dun prazo de dez días hábiles para comunicar as horas de uso que non acepten en cada unha das instalacións asignadas.
O Concello de Carballo publicou a resolución provisional da convocatoria para a asignación de uso das instalacións deportivas municipais destinadas ao desenvolvemento de actividades físicas e deportivas de iniciativa privada co patrocinio municipal durante a tempada 2026-2027.
En total, participaron na convocatoria 19 entidades deportivas, entre clubs e escolas de fútbol, baloncesto, balonmán, hóckei e patinaxe, ximnasia rítmica, salvamento, capoeira e outras modalidades deportivas.
A proposta provisional contempla a distribución de máis de 500 horas semanais de uso das instalacións deportivas municipais, procurando unha utilización racional, equilibrada e eficiente dos recursos dispoñibles. O Anexo I da resolución detalla as asignacións por entidade, instalación, día e franxa horaria.
As entidades ás que se lles asignan provisionalmente instalacións ou espazos deportivos son:
• Agrupación Deportiva Fogar da Xuventude
• Agrupación Deportiva Un Paso Máis
• Asociación Capoeira Bergantiños
• Asociación Cultural e Deportiva Awen
• Asociación Deportiva Xiria
• Bergantiños F.C.
• Club Baloncesto Artai
• Club Rítmica Carballo
• Club Rítmica Pangea
• Escola Basket Xiria
• Escola Lubiáns de Hóckei e Patinaxe
• Escolas Balonmán Xiria
• Escolas de Fútbol Luis Calvo Sanz
• Lenda Educativa
• Salvamento y Socorrismo Carballo
• Sociedade Deportiva San Lorenzo
• Sociedade Deportiva Sofán
• Sociedade Deportiva Oza
• Virgentis Salvamento Bergantiños
Campos de fútbol, pavillóns, ximnasios e piscinas
A distribución abrangue unha ampla variedade de instalacións municipais. Entre os campos de fútbol figuran As Eiroas, O Carral-Sofán e As Pedreiras-Verdillo.
No apartado de pavillóns, a asignación inclúe os de Vila de Noia e Carballo Calero, así como os pavillóns dos CEIP Fogar, Xesús San Luís Romero, Plurilingüe Gándara-Sofán e Plurilingüe Nétoma-Razo, e os dos IES Isidro Parga Pondal e Monte Neme.
Tamén se asignan ximnasios e outros espazos deportivos do CEIP Xesús San Luís Romero, CEIP Fogar, IES Isidro Parga Pondal, CEIP Bergantiños e CEIP A Cristina, ademais da zona do anfiteatro do pavillón Carballo Calero.
A proposta incorpora igualmente horas de uso das piscinas municipais Carballo Calero e Vila de Noia, así como das pistas de adestramento do Chorís.
Dez días hábiles para presentar renuncias
A resolución ten carácter provisional e as entidades solicitantes dispoñen agora dun prazo de dez días hábiles para comunicar as horas de uso que non acepten en cada unha das instalacións asignadas.
A distribución poderá comezar a ser efectiva a partir do 1 de setembro de 2026, aínda que a asignación non adquirirá carácter definitivo ata que se dite a correspondente resolución definitiva.
Con esta proposta, o Concello de Carballo avanza na planificación da actividade deportiva municipal para a nova tempada, facilitando ás entidades a organización dos seus adestramentos e actividades e buscando, ao mesmo tempo, optimizar o aproveitamento das instalacións e espazos deportivos municipais.