As instalacións do Fórum de Carballo acolleron este martes a presentación de Costa da Morte Runner, o novo videoxogo impulsado pola APTCM e desenvolto polo vimiancés Martín Caamaño, un informático de profesión e creador da marca Costa da Morte Death Coast. Cunha estética inspirada nos clásicos arcade e no pixel art, o xogo percorre os 17 concellos da Costa da Morte a través de lugares emblemáticos, lendas, patrimonio, ferramentas tradicionais, personaxes e historias vencelladas á identidade do territorio. O protagonista da aventura é Eustaquio, quen deberá superar diferentes obstáculos e desafíos para conseguir rescatar á princesa Mía. Unha maneira divertida e innovadora de demostrar que a Costa da Morte tamén pode descubrirse xogando dun xeito divertido e interactivo. O videoxogo é totalmente gratuíto, pode utilizarse en móbiles, tabletas e ordenadores e estará dispoñible a través da páxina web do xeodestino Costa da Morte.
0