Rober Cagiao pechou o curso do Club de Lectura de Adultos cun encontro arredor de Cadea de favores. A visita de Rober Cagiao ao Club de Lectura de Adultos converteuse nunha magnífica oportunidade para conversar arredor da súa obra Cadea de favores. Durante o encontro, o autor compartiu coas persoas asistentes detalles sobre a creación da novela, as inspiracións da historia e diferentes reflexións sobre a escrita e o proceso creativo.
A sesión desenvolveuse nun ambiente próximo e participativo, no que os lectores e lectoras puideron intercambiar impresións co autor, formular preguntas e afondar nos temas e personaxes da obra, facendo da lectura unha experiencia compartida e enriquecedora.
Con esta actividade pecha tamén o Club de Lectura de Adultos deste curso, despois de varios meses nos que os libros se converteron nun punto de encontro para o diálogo, a reflexión e o desfrute da literatura.
Desde o centro queren agradecer especialmente a Rober Cagiao a súa visita, a súa cercanía e a xenerosidade á hora de compartir esta experiencia co club. Tamén dan as grazas a todas as persoas asistentes e aos autores e autoras que os acompañaron ao longo do curso.
Animan a todo o mundo a descubrir e ler Cadea de favores, unha obra que sen dúbida segue deixando pegada entre os lectores e lectoras.
O Club de Lectura retomará a súa actividade o vindeiro curso con novas lecturas e novos encontros arredor dos libros.
0