Este mércores deuse un paso definitivo para transformar o corazón de Carballo. Saíu a licitación o gran proxecto de reurbanización da Praza do Concello, rúa Cervantes e rúa Gran Vía, cun investimento de 1,88 millóns de euros (cofinanciado con fondos europeos FEDER dentro do proxecto «Carballo a man»).
Que vai cambiar?
- Máis accesibilidade: plataforma única, sen bordillos nin desniveis. Prioridade peonil!
- Máis verde: plantaranse 42 novas árbores para crear zonas de sombra e regular a temperatura.
- Mellores servizos: renovación total do pavimento (granito antiescorregadizo) e das redes de auga, saneamento e iluminación eficiente.
Un espazo máis amplo para a feira:
O proxecto inclúe a demolición da antiga cafetería (aberta en 1990 e sen uso desde 2019). Os graves problemas de accesibilidade do edificio, insalvables segundo a normativa actual, facían imposible darlle un novo uso. Con esta medida, gáñase unha gran zona diáfana para o desfrute veciñal e para potenciar o mercado ambulante.
As empresas interesadas teñen de prazo ata o 22 de xuño para presentar as súas ofertas. O prazo de execución será de 9 meses.