O encontro que se celebra este venres e sábado reúne a profesionais de distintos ámbitos para compartir experiencias e coñecemento arredor do liderado feminino, especialmente no ámbito rural.
A alcaldesa de Vimianzo, Mónica Rodríguez, destaca o valor de acoller este tipo de encontros no municipio, «que contribúen a dinamizar o territorio, a xerar oportunidades e a visibilizar e poñer en primeiro plano o talento e a capacidade das mulleres da Costa da Morte».
Un foro de referencia en Galicia
Alza Voz de Muller consolídase como un espazo de referencia en Galicia para a reflexión, o intercambio de experiencias e a creación de sinerxías arredor do liderado feminino. O programa desta segunda edición está deseñado para xerar impacto e favorecer a conexión entre profesionais, emprendedoras e axentes sociais.
O foro conta coa participación de recoñecidas profesionais como María Fornet, psicóloga e autora; Yolanda Domínguez, artista visual e consultora; e Laura Sagnier, activista pola equidade, que abordarán cuestións clave para o fortalecemento do liderado feminino e o impulso de proxectos innovadores no ámbito rural.