Este xoves foi a quenda da voadura das catro icónicas torres de refrixeración da central térmica das Pontes, co que a cheminea do complexo de 356 metros quedará a partir de agora como única testemuña do pasado industrial das Pontes de García Rodríguez. A operación, que afectou a catro estruturas de 99 metros de altura e un peso total de 45.000 toneladas, desenvolveuse baixo un estrito dispositivo de seguridade e cunha gran afluencia de público.
Dada a envergadura da voadura, despregouse un amplo dispositivo que contou coa participación da Garda Civil, Policía Local, Protección Civil e Bombeiros. Ademais, o equipo Pegaso da Garda Civil supervisou o control de drons na zona afectada.
En xullo de 2028 a desaparición da central deixará 55 hectáreas de solo industrial. O antigo parque de carbón prepárase para acoller unha bioplanta de fibras recicladas de ENCE. As Pontes despide o seu pasado de carbón e cunha nova paisaxe, dálle a benvida á economía verde.