O PSdeG-PSOE celebrou este sábado un encontro con candidatos e cargos públicos e orgánicos das comarcas de Bergantiños, Costa da Morte e Soneira no parque do Anllóns, en Carballo, no marco da campaña das eleccións xerais do próximo 29 de novembro.
No acto participaron Patricia Iglesias, deputada autonómica; Jorge Domínguez, Inés Ramos e José Manuel Pérez Abelenda, candidatos da comarca, ademais de voceiros, concelleiros e outros representantes socialistas do territorio.
Durante o encontro, a candidata socialista Inés Ramos reivindicou o esforzo diario da veciñanza de Bergantiños e destacou a necesidade de impulsar políticas que xeren oportunidades laborais, garantan uns servizos públicos de calidade e favorezan o desenvolvemento económico e social da comarca.
«O motor de Bergantiños é a xente que madruga todos os días, aquí en Carballo, na Laracha e en todos os concellos da comarca. O noso compromiso é claro: traer oportunidades reais, coidar os nosos servizos públicos e construír futuro desde aquí, desde a comarca de Bergantiños», afirmou.
Ramos destacou tamén a importancia do traballo diario e do compromiso coa veciñanza como elementos fundamentais da acción política nos municipios.
«O noso motor, a nosa forza, é a nosa xente, os nosos veciños e veciñas e o traballo real de cada día», subliñou.
Pola súa banda, a deputada autonómica Patricia Iglesias destacou a transcendencia das eleccións do próximo 29 de novembro e contrapuxo as políticas sociais impulsadas polo Goberno de Pedro Sánchez ás propostas do PP e Vox, advertindo do risco de retrocesos en materia de dereitos e protección social.
«Temos dous modelos claros: por unha banda, o retroceso, a privatización das pensións e a ausencia de xustiza social; pola outra, o progreso, a xustiza social e as políticas que miran pola vida da xente e da clase traballadora», sinalou.
Iglesias puxo en valor a revalorización das pensións garantida por lei, o incremento do salario mínimo interprofesional e o reforzo das bolsas de estudo para a mocidade durante os últimos anos.
A parlamentaria socialista resumiu as diferenzas entre os modelos políticos que, ao seu xuízo, se confrontan nestas eleccións coa expresión «fronte a dereitas, dereitos».
O encontro no parque do Anllóns forma parte das actividades que o PSdeG está a desenvolver nos distintos municipios da provincia da Coruña durante esta primeira fin de semana de campaña electoral, nas que a formación sitúa o emprego, os servizos públicos e a protección dos dereitos sociais entre os principais asuntos do debate electoral.