UCIN Galicia, a través do seu coordinador autonómico, José Luis Calo, reclama con carácter urxente a dotación dunha ambulancia medicalizada permanente para a Costa da Morte tras os graves incidentes asistenciais rexistrados durante a xornada do domingo, cando foi necesario recorrer de forma continua á ambulancia medicalizada da Coruña para atender e trasladar pacientes críticos da comarca.
Para UCIN Galicia, a situación vivida é «absolutamente insostible e intolerable» e supón unha mostra máis do progresivo deterioro da sanidade pública galega, consecuencia directa da falta de planificación, investimentos e recursos por parte da Xunta de Galicia.
José Luis Calo sinala que «non é admisible que os veciños da Costa da Morte teñan que depender de recursos desprazados desde A Coruña, deixando ademais desprotexida a propia área sanitaria coruñesa. Estamos falando de emerxencias vitais nas que cada minuto conta e nas que unha demora pode marcar a diferenza entre a vida e a morte».
Desde UCIN Galicia lembran que esta reivindicación non é nova e que a formación leva anos denunciando as carencias dos servizos de emerxencias sanitarias en diferentes comarcas galegas. O último exemplo produciuse recentemente na Mariña lucense, onde tamén se puxeron de manifesto importantes déficits na cobertura asistencial e na dispoñibilidade de recursos medicalizados.
A formación municipalista considera que os feitos ocorridos este domingo son un serio aviso do que pode suceder durante os meses de verán, cando a poboación da Costa da Morte aumenta considerablemente debido á chegada de turistas, deportistas e visitantes.
«Se o sistema xa colapsa nun domingo ordinario de primavera, o escenario que pode presentarse durante xullo e agosto resulta preocupante. Non podemos permitir que miles de persoas queden expostas a unha atención sanitaria insuficiente por falta de medios», afirma Calo.
UCIN Galicia responsabiliza directamente ao presidente da Xunta, Alfonso Rueda, da situación actual da sanidade pública galega, denunciando que o Goberno autonómico continúa ignorando as demandas dos profesionais sanitarios, dos usuarios e das entidades sociais que reclaman máis persoal, máis medios e unha mellor planificación dos servizos de emerxencias.
«Mentres a Xunta presume de cifras e anuncios, a realidade nas estradas e nos centros sanitarios é ben distinta. Galicia non pode seguir funcionando a base de parches nin improvisacións. Os profesionais están ao límite e os cidadáns pagan as consecuencias», denuncia o coordinador de UCIN Galicia.
Por todo iso, UCIN Galicia esixe a adopción inmediata das seguintes medidas:
•Implantación dunha ambulancia medicalizada permanente para a Costa da Morte.
•Reforzo dos servizos de emerxencias durante a campaña estival.
•Incremento do persoal sanitario e dos recursos asistenciais nas comarcas con maior dispersión xeográfica.
•Elaboración dun plan autonómico que garanta a igualdade de acceso á atención sanitaria urxente en todo o territorio galego.
A formación conclúe advertindo que continuará defendendo esta reivindicación nas institucións e ante a cidadanía ata que se garanta unha cobertura sanitaria digna e segura para todos os galegos, independentemente do lugar onde residan.