O lume afectou a un vehículo estacionado nun garaxe comunitario situado na rúa Laguna, en Sada.
O 112 Galicia recibiu a primeira chamada de alerta ás 17:15 horas deste luns. Un particular informou da presenza dunha intensa fumareda que saía do interior dun garaxe, onde, segundo indicaba, podería estar ardendo un vehículo.
Poucos minutos despois, outra persoa contactou co Centro Integrado de Atención ás Emerxencias para advertir de que se escoitaban berros de auxilio procedentes do interior. Non obstante, durante esa mesma comunicación confirmouse que a persoa xa se atopaba fóra.
De inmediato, desde o 112 Galicia informouse aos Bombeiros de Betanzos e de Arteixo, aos efectivos de Emerxencias de Oleiros, á Policía Local e a Protección Civil. Así mesmo, informouse ao Servizo de Urxencias Sanitarias de Galicia-061.
Unha vez rematada a intervención, os equipos desprazados confirmaron que o incendio afectara a un turismo estacionado nun garaxe comunitario que dá servizo a tres edificios. Como consecuencia do suceso, unha persoa tivo que ser trasladada ao Punto de Atención Continuada (PAC) por inhalación de fume.